SANS A PAWOL ADAN MIZIK NOU ENME (LYRICS MEANING)

DÉVENN AN FON FÉRAN
(Esnard Boisdur)


  

Dimanch jou dèrèpo
Sété ladévenn pou lé Bouko
 
Woy, 
Kan lévwazinaj té tann kou-la
Yo konprann sété chasè.
On gran moman vini koulé
Apré yo ka tann anmwé-soukou.
Yo désann an fon Féran
Lèwvwè yo rivé anba pon-la
Yo touvé Cholo kouché atèla
Cholo potoko mò
Cholo di lévwazinaj: 
« Si zò vlé sové-mwen,
Tiré dé bòt-la an pyé an-mwen ;
Mété-yo ban mwen anba tèt an-mwen.
Ban'an tibwen dlo pou mwen bwè.
Tout kò an-mwen ja ka angoudi.
Mwen désann an fon Féran.
Sé kann an-mwen, an té vin koupé.
Lèwvwè an fini koupé kann-la, 
An té ka lavé dé men an-mwen, 
An pa fè Chaben ayen. 
Pa ni afè épi Chaben.             
Chaben té kouché anba bwa-la,
Fouté-mwen on kout fizi,
Senten an ké mò. »
 
Dimanch jou dèrèpo
Sété ladévenn pou lé Bouko, Woy ! 
  
« Woy ! 
An tann téléfòn té ka sonné,
An vwè lanbilans té ka désann,
Jandab-Sentàn ogalo, 
Polis-Gozyé an lari-la
Anmwé-anmwé, osoukou,
Kondoléyans pou lé Bouko
Moun-Moro dézèspéré
Toutmoun-Bouliki ka kouwi
Moun-Granfon, yo ka désann
Prèmyé fwa, yo vwè biten konsa
Onsèl wélélé, plato Bawo
San ka koulé kon dlo an Fon Féran
                 Dimanch jou dèrèpo
                                                                   Alarèpriz
Sété ladévenn pou lé Bouko
 
« Woyoyoy ! woy ! 
Avan Cholo té désédé
Cholo di lévwazinaj: 
« Pannanlévakans, Chaben té ni
On bèf pou pé kyouyé
An kyouyé bèf-la pou chaben
An vann vyann-la ba-li
Òktòb té ka rivé
Pou i pé voyé timoun lékòl.
An konpwann i té zanmi an-mwen
An pa té sav i té ka véyé-mwen
Monchè, Chanben ou sé on trèt
Fouté-mwen on kout fizi pou kyouyé-mwen
 
Dimanch jou dèrèpo
Sété ladévenn pou lé Bouko
 
« Woy-yoyoy ! 
Anben Chanben, sé on kriminèl
Gason a Chanben, sé on mizérab
Si ou té on pè-dè-bòn-famiy
Ou tini prèmyé gason a-vou
Ou té ké mété-y sizé
Pou ou té préché-y édikasyon
Olyé ou té lévé dimanch-maten
Pou zò té pé détwi tout fanmi-la
 
             Dimanch jou dèrèpo
                                                                  Alarèpriz
Sété ladévenn pou lé Bouko